بيوت كتيرة

بيوت كتيرة
اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم
*
مسحراتي
منقراتي
طلبت مراتي
مهر الأميرة
وأنا بحر فني
شال ميت جزيره
أنا المغني
لبيوت كتيره
تمن اللى قسطه
قطم له وسطه
ولا اللى مطلى
بمزاج عواطلي
من بره رايق
مليان حرايق
أصل القرايه
مش في المرايه
لكن في صفحه
ابيض على اسود
دى حكمه واضحه
خلينى أحود
على بيت فى حاره
لولى في محاره
وبيت في عطفه
لولى في صدفه
وبيت بقوقع
خايف ليوقع
وبيت بساقية
ع العهد باقيه
وبيت عتبته
عنوان كتابته
وبيت فى زقه
بعيش ودقه
وبيت خزينه
لخبازينه
وبيت يولد
الجاى بعده
ولا حد خلده
ولا حد وحده
على المداخل
بعد المداخن
بيوت مداين
إبني يا وعده
بيوت بناتها
عرسان بناتها
أنا بيناتها
*
المشي طاب لي والدق على طبلي
ناس كانوا قبلي قالوا في الامثال
الرجل تدب مطرح ماتحب
وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي حته من كبدي حته من موال
*
المشى طاب لي علي طبلي وناياتي
تشب فيها العيدان تجري قناياتي
تسقى وانا سقا
عمره ما قال لاه
تحت القمر شقه
قالت الشوارع باتابع دقة دقه
ودقة دقة تتمايل بناياتي
*
اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق